Spelle dievva láibi

Dákkár láibun ii ájit gale duššás!

Mus lei boarásmuvva mielki galbmaskáhpes, de šadden láibut juoidá. Oainnestin tv:as ahte ná maid sáhttá láibut láibbi, de fertejin geahččalit.

Ligge oapmana 225 lieggaceahkkái.

Dárbašat:

5 dl mielkki
50 gr jeastta
2 teadjabaste sálttiid
2 baste siráha
50 gr vuoja dahje margarin
s. 10-15 dl roavva nisujáffuid (jorbaláibe) jos bijat dušše dáid jáffuid

Mun liikon bidjat s. 9 dl roavvanisujáffuid ja s. 4-5 dl jeastaláibejáffuid. Lasihin vel hávvargordnegaraid* 3 dl ja beallemassiepmaniid** 2 čormma dievva. Ja jos muhtun jáffut nohket, lasit juoga eará jáffuid maid skáhpes gávnnat.
(* jorgalus vuolde)

1. Luvvat jeastta loikačáhcái.
2. Lasit sálttiid ja siráha.
3. Sehkke jáffuid čáhcái ja fiero.
4. Lasit loahpas vuoja.
Divtte dáiggi leat njárbat, vai lea álkit lebbet dan spelle ala.
5. Govčča dáiggi liinnen, lokte lihtti lieggasii ja divtte dáiggi loktanit duppalsturrosažžan.
6. Go dáigi lea loktanan, leike dáiggi njuolga spelle ala ja lebbe dássidit olles spelle ala.
7. Govčča láibbi bures liinnen ja divtte dan vel loktanit ovdal bijat oapmanii.

Goikat láibbiid oapmana gaskkamuttos sullii 12-15 minuvtta. Go láibi lea goikan, de dás lea álki čuohppat heivvolaš bihttážiid.

*hávvargordnegarat = kauralese, havrekli
**beallemassiepmanat = pellavansiemen, linfrö

Vuoncábiegobuonjus2

Hui álki.

400 gr cávaduvvon vuoncábiergu dahje filé
1 burke ananasaid
1 baste ollju
1/2 sitronsávtta
2 dl Keiju šaddovuoja (14% vuodja)
1 deadjabaste curry
1/2 deadjabaste sálttiid
1/4 sitronbihppor

1. Steikke vuoncábierggu steikkenkasáras.
2. Čuohpa ananasvajahasaid ja lasit daid vuoncábirgui.
3. Leike mielde sitronsávtta ja šaddovuoja.
4. Bija máistun curry, bihpporiid ja sálttiid.
5. Divtte smávvát duoldat fiidna lieggasis sullii 20 minoha.

Fála butnjosa čáhppes riissain, pastain dahje saláhtain. Duolddat pasta (dá mus dákkár "hearva"pasta).

Mális-Máret, Bistro-Birjá, Gievkkangáigá ja Vaffelat

Bures boahtin! Don leat dál guovlalan sámenieiddaid borramušbloggii! Mii eat beakke iežamet čeahpes gohkkendáidduid dihtii, muhto mii blogget vai gollegiella gullo! Mis leat ollu earáge hommát go gohkken, ja vai málesteapmi livčče veahá álkkit de leat juogadan muhtin bagadusaid dinguin. Boras ain - ja gohčču ain borrat!

Mális-Máreha ovdagovat gievkkanis leat sámeeatnit ja -áhkut geat ieža čisket ađđamiid ja doidet čoliid. Su biebmomáilbmi lea nu árbevirolaš go juo su dáidduin sáhttá. Rántos čoalit eai dohkket juohkelágan jáffuid, ja nuba son gohkke dábálaš biebmuid. Dán ođđa áigge boaresnieidda veaskkus gávdno álo (!) cahppojuvvon goikebiergu.

Bistro-Birjá lea akademalaš karrieranisu. Barcelona gáhtat leat sutnje oahppáseabbo go gievkkanskáhpet. Dál lea bisánan nu olu, ahte lea darvvihan guvssi gihtii ja guovlalan skáhppii! Son árvvusatná báikkálaš borramušávdnasiid, maidguin de heivehallá ođđa kombinašuvnnaid. Bistro-Birjjá ambišuvdnan lea málestit bohccobierggus biergofondue! Buen provecho fal buohkaide!

Gievkkangáigá lea dán joavkku gávpotsápmelaš ja su gievkkanis duldet maid eksohtalaš ruotnasat. Son málesta juohke beaivve, ja máhttá fierrut stuorra ruittuid maid. Gáigá goaivu interneahtas bagadusa go bagadusa, ja das šaddá álo njálgga! Son go botkkesta mállásii bihpporiid - dat leat álo muttágit!

Vaffelat lea dálu eamit ja su gievkkanis eai moalut dihtto. Dan botta go čielgemális duoldá, de son fierrula vaffeldáiggi. Uhca vehkiide gávdno maid álo smávva bargu su gievkkanis. Son go jorggihaddá bevddiid gaskka, de oatnelanbottas lea bearaš bibmojuvvon, beavdi čorgestuvvon ja teadjačáhci duldestuvvon! Dasto vurdet jo eará hástalusat.